Iha semana ida ne’e nia laran Juiz hamutuk ema nain 8 ho ProKurador ida fila fali mai Timor-Leste bainhira remata tiha sira nia treinamentu legal iha Portugal durante tinan ida.

‘JSMP hakarak hato’o Bem Vindo ba Autor Tribunal sira. Ami mos hakarak haree Juizes sira ne’e bele hahú fila fali sira nia funsaun, ne’ebe tribunal distritu Oecusse no Baucau atu totalmente bele servisu fali ’ tenik JSMP.

Iha fulan Jullu 2003, Juiz hamutuk ema nain 8 no Procurador ida ba iha Portugal durante tinan ida atu tuir treinamentu hanesan parte ida ne’ebe Timor-Leste ho Portugal sira nia programa kooperasaun iha area Justica nian.

Benefisiu ba participantes ida-idak no sistema judicial seidauk bele halo avaliasaun. Oin-nusá mos bele haree difikuldade hirak ne’ebe autores iha Timor-Leste nia laran iha tiha ona no funsionamentu jéral ba tribunal hirak hotu ne’ebe hetan durante tinan kotuk. Tribunal Distrital Oecuse, tribunal ida ne’ebe iha mos difikuldade barak liu tanba iha deit Juiz nain ida ne’ebe uluk ba tiha Portugal. Tribunal seluk hanesan Baucau, Suai no Dili durante tempu ne’ebe Juiz sira iha Portugal haka’as an atu servisu maka’as maiske autor tribunais la iha Timor-Leste laran. Procesu iha Tribunal sira mos demora durante tempu hirak ne’e.

JSMP hanoin katak buat sira ne’e hotu importante tebes atu halo avaliasaun ida atu nune’e bele identifika sa ida mak positivu no sa ida mak negativu kona-ba treinamentu ida ne’e. Prosesu avaliasaun ne’e importante teb-tebes se karik sistema judicial sei konsidera atu haruka tan autores tribunal seluk ba fali País seluk atu halo treinamentu ne’ebe ho tempu kleur. JSMP fiar katak avaliasaun ida ne’e presiza iha natureza publika atu garantia participasaun orgaun hot-hotu ne’ebe hola parte iha sitema judisial iha Timor-Leste.

JSMP fiar katak agora tribunal hotu-hotu iha opurtunidade bo’ot atu uza abilidade foun husi Juiz sira ne’ebe foin fila husi Portugal. Oportunidade ida ne’e tenke dezenvolve hamutuk ho experiensia autores seluk mos dezenvolvimentu ne’ebe oras ne’e daudaun halao nafatin iha Timor-Leste ninia sistema judisial ne’ebe hahú husi tinan kotuk liu ba.