Kona Ba JSMP

JSMP harí iha fulan Abril tinan 2001 atu halo monitorizasaun kona ba prosesu Tribunal Ad Hoc Direitu Humanus ho kazu Krimes Graves iha Timor Leste. JSMP ho lalais atende fo monitorizasaun ba tribunal no halo analiza ba sistema judisial inklui mos halo observasaun servisu ba tribunal distritu sira. JSMP mos halo analiza legislativu.

JSMP liu husi Unidade Relasaun Publiku halo servisu intensivu iha Dili no mos ba iha rai liur. Objektivu husi servisu ne’e atu informa ba komunidade Timor Leste kona ba desizaun Tribunal Ad Hoc ho Panel Spesial ba kazu krimes graves nian. Unidade Relasaun Publiku JSMP nia servisu mak hanesan fo treinamentu direitus humano, treinamentu ba funsionariu judisial sira, no hala’o workshop iha distritu atu esplika prosesu judisial, kazu sivil no direitu politiku ema nian.

Iha tinan 2004, JSMP mos hari tan unidade ida hanaran Women's Justice Unit ( Unidade Justisa ba Feto sira ) nebe’e fo atensaun ba kazu sira nebe’e involve feto hanesan victima husi violensia domestika. Unidade ida ne’e hamrik hanesan resultadu husi peskizasaun nebe’e JSMP hala’o iha sektor justisa formal ba feto sira iha tribunal.

Iha tinan 2005, JSMP mos hari tan unidade ida hanaran Victim’s Support Servise ( Unidade Fo Tulun ba Victima ). Unidade ida ne’e hanesan referensia legal nomos atu fo ajuda legal ba feto sira nebe’e sai victima.

Vizaun husi JSMP atu forma liu tan organizasaun ida nebe’e independente iha Timor Leste nebe’e fo nia kontribuisaun atu dezenvolve no hadia sektor justisa ho sistema legaslativu liu husi servisu monitorizasaun, analiza, advokasia no treinamentu ho rasaun ida atu tulun no hasae prosesu lei no direitus humano.

Atu hasae tan sistema judisiariu nebe’e independente, profesaun legal sira ho hadia sistema administrasaun justica atu aumenta liu tan sistema sira ne’e tuir standar internasional nebe’e iha. Halo promosaun husi adopsaun no implementa standar direitus humano internasional ho mos parte legal sira seluk ho prinsipiu atu hasae tan direitus humano no lei nebe’e iha.

Halo promosaun ba estabilizasaun no hametin liu tan sistema legal nebe’e fo protesaun ba individu, grupu nebe’e kontra sira direitus humano.

Halo promosaun ba ema nia hatene no ema nia harakak iha parte lei no direitus humano. Nune’e mos fo asistensia sira ne’e hotu ba ema sira nebe’e lakon sira nia direitu ba lei no direitus humano.

Halo promosaun ba egualdade no direitu ema ida-idak nian atu simu buat nebe’e hanesan no hetan asesu nebe’e diak ba prosesu justica liu husi tratamentu lei nebe’e justo.